ദ് പയനിയർ

ദ് പയനിയർ - ഒരു വായനാനുഭവം.

ഏതൊരു ദൗത്യം ഏറ്റെടുക്കുമ്പോഴും അതിനിടയിൽ വന്നെത്തുന്ന പ്രതികൂല സാഹചര്യങ്ങളെ അതിജീവിച്ച് അതിൻ്റെ പൂർണ്ണത കണ്ടെത്തുന്നതു വരെ നിശ്ചയ ദാർഢ്യത്തോടെ അക്ഷീണം യത്നിക്കാൻ ആർജ്ജവമുള്ള ഒരു മനസ്സാണ്, ഒരു വ്യക്തി പ്രാഭവമാണ് ദ് പയനിയർ എന്ന പുസ്തകത്തിൻ്റെ ആകെത്തുകയായി എനിക്ക് മുന്നിൽ നിറഞ്ഞു നിൽക്കുന്നത്. തീവ്രമായ അഭിലാഷങ്ങളുടെ പിൻബലവും അർപ്പണബോധവുമാണ് ആ നിലപാടുകൾക്ക് ശക്തിയേകുന്നതെന്ന് പുസ്തകം നമ്മോട് പറയാതെ പറയുന്നുണ്ട്. നിങ്ങൾ ഏതൊരു കാര്യം മനസ്സിൽ അദമ്യമായി ആഗ്രഹിക്കുന്നുവോ അത് നേടാൻ ലോകം മുഴുക്കെ നിങ്ങൾക്ക് പിന്തുണയുമായി പിറകിലുണ്ടാവും എന്ന് പൗലോ കൊയ്ലോ പറഞ്ഞതിൻ്റെ ഉത്തമോദാഹരണമായിട്ടാണ് ഗൾഫാർ മുഹമ്മദാലി സാഹിബ് എന്ന വ്യവസായ പ്രമുഖൻ്റെ ജീവരേഖാചിത്രം നമുക്ക് മുന്നിൽ വിടരുന്നത്. ആലങ്കാരികതകളോ അതിശയോക്തികളോ ഏറെയില്ലാതെ തന്നെ ഡോ. മുഹമ്മദാലിയുടെ ജീവിതാനുഭവ യാഥാർത്ഥ്യങ്ങൾ അനായാസേന വരച്ചിടാൻ ഡോ. എൻ.എം. ഷറഫുദ്ദീൻ്റെ നല്ല ഒഴുക്കുള്ള ഭാഷക്ക് സാധിച്ചിട്ടുണ്ട് എന്നത് അനുവാചകന് മുഷിപ്പില്ലാതെ വായിച്ചു നീങ്ങാൻ ഏറെ സഹായകമാവുന്നു മുണ്ട്.

ഗ്രന്ഥകാരൻ സൂചിപ്പിക്കുന്നത് പോലെ ഈ പുസ്തകം ഒരു ജീവചരിത്ര കുറിപ്പല്ല തന്നെ. എങ്കിലും ഡോ. പി മുഹമ്മദാലിയെന്ന വിശിഷ്ടവ്യക്തിയുടെ, വിജയങ്ങളുടെയും സന്തോഷനിമിഷങ്ങളുടെയും രേഖാ ചിത്രങ്ങൾക്കൊപ്പം ഒരു കൊളാഷ് പോലെ അദ്ദേഹത്തിൻ്റെ ജീവിതത്തിലെ നിരവധി ക്ലേശകരമായ മുഹൂർത്തങ്ങളെ കൂടി ഇത് അനാവരണം ചെയ്യുന്നുമുണ്ട്. അത് കൊണ്ട് തന്നെ ആ കാലഘട്ടത്തിൽ അദ്ദേഹം നേരിട്ട വ്യത്യസ്ത അവസ്ഥകളിലൂടെ കടന്ന് പോകാൻ നമുക്കാവുന്ന വിധമാണ് പുസ്തകത്തിൻ്റെ ആഖ്യാന ഘടന. അത്തരം വിവരണങ്ങളിലെ വരികൾക്കിടയിൽ നിന്നും നമുക്ക് സൂക്ഷ്മമായി കണ്ടെത്താനാവുന്ന യാഥാർത്ഥ്യം വിട്ടുവീഴ്ചയില്ലാത്ത സമർപ്പണത്തിൻ്റെ ഉദാത്ത മാതൃകയായി തീർന്ന, ഇച്ഛാശക്തിയുടെ പ്രതീകമായ ഒരു മനുഷ്യനെയാണ്.

അദ്ദേഹത്തിൻ്റെ ഭാവനാപരമായ ഉൾക്കാഴ്ച, അടുത്ത ഘട്ടമായ ദൗത്യത്തിലേക്ക് പരിവർത്തിപ്പിക്കപ്പെടുമ്പോൾ അദ്ദേഹം പുലർത്തിയിരുന്ന നിതാന്ത ജാഗ്രത തന്നെയാണ് അതിൻ്റെ മൂല്യ വൈശിഷ്ട്യത്തെ നിർണ്ണയിച്ചിരുന്നതെന്ന കാര്യം ഗ്രന്ഥകാരൻ കണ്ടെത്തുന്നുണ്ട്. അരനൂറ്റാണ്ടിനിപ്പുറം ഇന്നൊരു ആഗോള പ്രസ്ഥാനമായി മാറിയ ഗൾഫാർ കെട്ടിപ്പടുക്കാൻ അദ്ദേഹമനുഭവിച്ച ത്യാഗങ്ങൾ അന്ന് ഒരൊറ്റയാളെ മാത്രം ബാധിച്ചിരുന്നതായിരുന്നെങ്കിൽ ഇന്ന് അതിൽ നിന്നാവിർഭവിച്ച സന്തോഷവും സമാധാനവും അനുഭവിക്കാനവസരം ലഭിച്ച വർ അദ്ദേഹത്തിന് ചുറ്റുമുള്ള ഒരു വലിയ ലോകം തന്നെയാണ് എന്ന നിരീക്ഷണം ഒരു യാഥാർത്ഥ്യമായി തന്നെ പുസ്തകം അടിവരയിടുന്നുണ്ട്. ശരിക്കും ഒരു യഥാർത്ഥ മനുഷ്യനെ കണ്ടെത്താനും അവതരിപ്പിക്കാനും അതിൽ സന്തോഷിക്കാനും ഗ്രന്ഥകാരന് അവസരമൊരുങ്ങി എന്നതും കൂട്ടി വായിക്കേണ്ടതാണ്.

ഡോ.മുഹമ്മദാലിയുടെ ജീവിതത്തിലെ തുടക്കം അത്ര വളരെ എളുപ്പമായിരുന്നില്ല എന്നാണ് പുസ്തകം നമ്മളോട് പറയുന്നത്. ഗൾഫിലെ ചൂടേറിയ മരുഭൂമിയെ തനിക്കും ലോകത്തിനും ഉപകാര പ്രദമാവുന്ന രീതിയിൽ മെരുക്കിയെടുക്കാൻ തനിക്കാകുമെന്ന ആത്മവിശ്വാസം മാത്രമായിരുന്നു അദ്ദേഹത്തിന്റെ മൂലധനം. ഈ ഇച്ഛാശക്തി അദ്ദേഹത്തിന് സഹനം സ്ഥൈര്യം എന്നിവ എന്തെന്ന് പഠിപ്പിച്ചു. അതിനാൽ ഏത് സങ്കീർണ്ണമായ പ്രശ്നങ്ങൾക്ക് മുന്നിലും വിട്ടുവീഴ്ചയില്ലാത്ത മനോഭാവത്തോടെ നില്ക്കാനും പൊരുതി നേടാനും അത് സഹായകമായി.

ഈ ആദ്യകാല പരിചയങ്ങളാണ് അദ്ദേഹത്തിന് ഭാവിയിൽ അഭിമുഖീകരിക്കേണ്ടി വന്ന ഏത് പ്രതിസന്ധിയെയും നേരിടാനുള്ള ആത്മവിശ്വാസം നൽകിയിട്ടുണ്ടാവുക. അദ്ദേഹം തന്റെ വിജയത്തിന്റെ പിന്നിലുള്ള ഈ കഠിനമായ യാത്രകൾ ഒരിക്കലും മറന്നിട്ടില്ല. ഇത് അദ്ദേഹത്തെ തന്റെ വേരുകളുമായി ബന്ധിപ്പിക്കുന്നതോടൊപ്പം നിരാലംബരായവരോടുള്ള സഹാനുഭൂതി നില നിറുത്തുകയും ചെയ്യാൻ ഉതകിയതായും നമുക്ക് കണ്ടെത്താനാകുന്നുണ്ട്. ജോലിക്കായി ശ്രമിച്ചിരുന്ന ഘട്ടം മുതൽ, ചെറിയ അവസരങ്ങളെ വലിയ വെല്ലുവിളികളാക്കി മാറ്റിയ യാത്രകൾ, എല്ലാം തന്നെ അദ്ദേഹത്തിന്റെ ഉറച്ച മനോവീര്യത്തിന്റെയും കഠിനാധ്വാനത്തിന്റെയും കഥകളായി നമുക്ക് വായിച്ചെടുക്കാനാകുന്നുമുണ്ട്.

ഇന്ന് അദ്ദേഹം ഉയർന്ന വിജയത്തിൻ്റെ കൊടുമുടിയിൽ വിരാജിക്കുമ്പോഴും, ആ പഴയ കാലഘട്ടത്തിൽ നേരിടേണ്ടി വന്ന വിഷമങ്ങൾ അദ്ദേഹം മറക്കുന്നില്ല. ഒരിക്കൽ അന്നത്തെ ഗവർണ്ണറുടെ നിർദ്ദേശം അനുസരിച്ച് മസ്കറ്റിൽ നിന്നും ഒരു പാടകലെ സൂർ എന്ന ഗ്രാമീണമേഖലയിൽ ഒരു ക്ലിനിക് സ്ഥാപിക്കുന്നതിനായി പോയ ഒരു യാത്രയെ കുറിച്ച് പുസ്തകം പ്രതിപാദിക്കുന്നുണ്ട്. യാത്രായോഗ്യമായ റോഡുകൾ ഒന്നും തന്നെയില്ലാതിരുന്ന അക്കാലത്ത് കുണ്ടും കുഴിയും നിറഞ്ഞ കല്പാതയിലൂടെയുള്ള ദീർഘയാത്രയിൽ സ്പെയർ ടയറുകളുൾപ്പെടെ എല്ലാ ടയറുകളും ഉപയോഗശൂന്യമായി. കഠിനമായ ചൂടും നോമ്പു കാലമായതിനാൽ ഉള്ള തളർച്ചയും വക വെയ്ക്കാതെ വണ്ടിയുപേക്ഷിച്ച് മുന്നോട്ട് നടക്കാൻ തുടങ്ങിയെങ്കിലും ഒരു ഘട്ടത്തിൽ ഇനിയൊരടി മുന്നോട്ട് വെയ്ക്കാനാവില്ലെന്ന തിരിച്ചറിവുണ്ടായി. സ്വന്തം മൂത്രമെങ്കിലും കുടിച്ച് തൊണ്ട നനക്കാൻ ശ്രമിച്ചപ്പോൾ കിട്ടിയത് ഒരു തുള്ളി ചോരയായിരുന്നുവെന്ന വെളിപ്പെടുത്തലിലൂടെ കടന്ന് പോവുമ്പോൾ എത്ര ഭീതിദമായിരുന്നിരിക്കണം ആ അവസ്ഥ എന്നോർക്കാൻ പോലും കഴിയാത്ത വിധം വായനക്കാരൻ ഒരു തരം വിഭ്രാന്തിയിൽ എത്തിപ്പെടുന്നു. കൂടെയുണ്ടായിരുന്ന പാർട്ണറാണ് അന്ന് അദ്ദേഹത്തെ ജീവിതത്തിലേക്ക് തിരിച്ചു കൊണ്ട് വന്നത് എന്ന് അദ്ദേഹം ചാരിതാർത്ഥ്യത്തോടെ ഇന്നും ഓർക്കുന്നുണ്ട്. സ്വന്തം വാക്കുകളിലൂടെയും പ്രവർത്തികളിലൂടെയും പുതിയ തലമുറയെ അദ്ദേഹം എപ്പോഴും ഓർമ്മിപ്പിക്കുന്ന ഒരു കാര്യം "വിജയം എന്നത് അക്ഷീണ പരിശ്രമത്തിന്റെയും സ്ഥിരതയുടെയും പ്രതിഫലം മാത്രമായി വേണം നിങ്ങൾ കാണേണ്ടത്." എന്നാണ്.

ഡോ. മുഹമ്മദാലിയുടെ ഏറ്റവും ശ്രദ്ധേയമായ സവിശേഷതയാണ് അദ്ദേഹത്തിന്റെ അനിതരസാധാരണമായ നിരീക്ഷണ പാടവം. ഓരോ സംരംഭത്തെയും അദ്ദേഹം ഒരു 'ദൗത്യം' ആയാണ് കണ്ടെത്തുന്നതും വിലയിരുത്തുന്നതും കൈകാര്യം ചെയ്യുന്നതും. ഒരു വ്യവസായം ആരംഭിക്കുക, ഒരു സാമൂഹിക പ്രവർത്തനം നടത്തുക, അല്ലെങ്കിൽ ഒരു സമുദായിക പ്രശ്നം പരിഹരിക്കുക എന്നിവയോടൊന്നും തന്നെ അദ്ദേഹം ഒരിക്കലും ഉപരിപ്ലവമായി സമീപിക്കാറില്ല. ഓരോ പ്രവൃത്തിയും ആഴത്തിലുള്ള ഉദ്ദേശ്യത്തോടെയും സമൂഹത്തിന് ദീർഘകാലാടിസ്ഥാനത്തിൽ ഉയർന്ന മൂല്യം ചെന്നു ചേരാനുള്ള ദൃഢനിശ്ചയത്തോടെയുമാണ് അദ്ദേഹം ഇടപെടുന്നത്. ഈ 'ദൗത്യബോധം' ആണ് അദ്ദേഹത്തിന്റെ സംരംഭങ്ങൾക്ക് ഉള്ളടക്കവും ദിശാബോധവും നൽകുന്നത്. അതോടൊപ്പം അവയെ വെറും ലാഭം നേടുന്ന സംരംഭങ്ങളിൽ നിന്ന് വ്യത്യസ്തമാക്കുന്നതും.

അടിസ്ഥാന വികസന സൗകര്യങ്ങൾ പോലും എത്തിനോക്കിയിട്ടില്ലാത്ത 1970കളുടെ തുടക്കത്തിലെ ഒമാനിലാണ് മുഹമ്മദാലി തൻ്റെ മനസ്സിലുള്ള ആശയങ്ങളെ വിത്തുകളാക്കി വിതയ്ക്കാൻ ഒരുമ്പെട്ടതെന്നോർക്കുമ്പോൾ ആ ധീരത മുറ്റിയ സാഹസത്തിന് ഒരു ബിഗ് സല്യൂട്ട് നല്കിയേ കഴിയൂ. ഒമാനിലെ മെഗാ പ്രോജക്റ്റുകൾ നേടി വിശ്വാസ്യതയുടെ മുഖമുദ്ര സ്വായത്തമാക്കാൻ അന്നത്തെ ആ ഇരുപത് കാരന് അവസരം ലഭിച്ചു എന്നത് ചിലപ്പോൾ ഒരു നിമിത്തമായിരുന്നിരിക്കാം.

എങ്കിൽപ്പോലും ആ നിമിത്തത്തെ തൻ്റേതായ ആശയ വൈപുല്യത്തിൽ രൂപപ്പെടുത്തിയെടുക്കാൻ കർമ്മ കുശലനായ ആ യുവാവിന് അധികം ആലോചിക്കേണ്ടി വന്നിരുന്നില്ല. അങ്ങനെ സർക്കാരിന്റെ വലിയ അടിസ്ഥാന സൗകര്യ പ്രോജക്റ്റുകളായ റോഡുകൾ, ആശുപത്രികൾ, തുറമുഖങ്ങൾ, എയർപോർട്ട്, എണ്ണ-ഗ്യാസ് പ്ലാന്റുകൾ എന്നിവ നിർമ്മിക്കുന്ന കരാർ ഗൾഫാർ ഗ്രൂപ്പിന് ലഭിച്ചു. ഈ പ്രോജക്റ്റുകൾ കമ്പനിയെയും അദ്ദേഹത്തെയും വിശ്വസനീയവും ഉയർന്ന നിലവാരമുള്ളതുമായ ഒരു ബ്രാൻഡായി ഉയർത്തി. ഇത് അന്താരാഷ്ട്ര തലത്തിൽ അംഗീകാരം നേടാൻ സഹായകമായി.

അവിടെ അദ്ദേഹത്തിൻ്റെ നിർമ്മാണ വൈദഗ്ധ്യങ്ങൾ പൂർണ്ണമാവാൻ തുടങ്ങുകയായിരുന്നു.

അതോടൊപ്പം അവിടത്തെ മനുഷ്യവിഭവശേഷിയെ ഉയർന്ന നിലവാരത്തിലേക്ക് എത്തിക്കാനുള്ള കഠിനശ്രമങ്ങളിലും അദ്ദേഹം ദത്തശ്രദ്ധനായിരുന്നു. ഉത്തരവാദിത്വമുള്ള ഒരു സമൂഹത്തെ വളർത്തിയെടുക്കുക എന്ന ആശയം പ്രയോഗതലത്തിൽ എത്തിക്കാനുമുള്ള പദ്ധതികൾ അദ്ദേഹം മുന്നോട്ട് വെച്ചു. ഇന്ത്യയിൽ നിന്ന് കൊണ്ട് ഇത്തരം ഒരാശയം സർക്കാരിന് മുന്നിലവതരിപ്പിച്ചാൽ നിഷ്കരുണം തട്ടിയെറിയപ്പെട്ടേക്കാം. എന്നാൽ അന്യനാട്ടുകാരനായ ഒരാളിൽ നിന്നുമുള്ള നിർദ്ദേശങ്ങൾ ഒമാൻ എന്ന രാഷ്ട്രത്തിന് സ്വീകാര്യമായി. അത് അദ്ദേഹത്തെ "ഒമാനൈസേഷൻ" പദ്ധതിയുടെ ജോയ്ൻ്റ് ചെയർമാൻ എന്ന ഉന്നത പദവിയിലേക്ക് വരെ എത്തിച്ചു എന്നത് ഇന്ത്യക്കാരായ നമുക്കോരോരുത്തർക്കും അഭിമാനിക്കാവുന്ന കാര്യമാണ്.

ഒമാനെ മറ്റ് സമീപ രാജ്യങ്ങളിലെ വികസനത്തിൻ്റെ രീതിയിലേക്ക് പതിയെപ്പതിയെയെങ്കിലും അങ്ങനെ കൈ പിടിച്ചു നടത്തിക്കാൻ അദ്ദേഹം വിശ്രമമില്ലാതെ പ്രവർത്തിച്ചു. ഭരണാധികാരികളുടെ പൂർണ്ണ പിന്തുണ നേടാനായിരുന്നെങ്കിലും അതിന് നേതൃത്വം നല്കാൻ അന്നത്തെ ഇന്ത്യക്കാരനായ ഈ യുവ എൻജിനീയർ കാണിച്ച ഔത്സുക്യത്തെ രാജ്യം ആദരപൂർവ്വം അംഗീകരിച്ചു. വിദ്യാഭ്യാസരംഗത്ത് വിപ്ലവകരമായ മാറ്റങ്ങൾ കൊണ്ട് വന്നതിൻ്റെ ബഹുമാനാർത്ഥം ഗ്ലാസ്ഗോ കാലിഡോണിയൻ യൂണിവേഴ്സിറ്റിയാണ് അദ്ദേഹത്തെ ഡോക്റ്ററേറ്റ് നല്കി ആദരിച്ചത്. ഒപ്പം രാഷ്ട്രനിർമ്മാണത്തിൽ പങ്കാളിയായ വിദേശിക്ക് രാജ്യവും പരമോന്നത ബഹുമതിയായ ഒമാൻ സിവിൽ ഓർഡർ നല്കി ആദരിച്ചു. പിന്നീട് പ്രവാസി ഭാരത് ദിവസ്ൻ്റെ ആദ്യ അവാർഡുകൾ പോലെ എത്രയെത്രയോ ആദരങ്ങളും അംഗീകാരങ്ങളും !

ഒരു ലക്ഷത്തിലധികം ആളുകൾക്ക് തൊഴിലവസരം നൽകുന്നതിലൂടെ അസംഖ്യം കുടുംബങ്ങളുടെ ജീവിതം മെച്ചപ്പെടുത്താനായിട്ടുണ്ട് എന്നത് ചെറിയ കാര്യമല്ല. ഡോ. മുഹമ്മദാലിയുടെ സംഭാവനകൾ അവിടെ അവസാനിക്കുന്നില്ല. അദ്ദേഹത്തിന്റെ മനുഷ്യസ്നേഹപരമായ പ്രവർത്തനങ്ങൾ ആ വലിയ മനസ്സിനെ വെളിവാക്കുന്നു. നിരാലംബരായവർക്ക് അദ്ദേഹം നൽകുന്ന സഹായം വെറും ദാനധർമ്മം എന്ന നിലക്കല്ല. മറിച്ച് അവരിൽ അന്തർലീനമായ ശക്തിയെ ഉണർത്തി സ്വാവലംബികളാക്കി മാറ്റുക എന്ന ലക്ഷ്യത്തോട് കൂടിയാണ്. ആ നിലയിൽ തന്നെയാണ് അത് പ്രയോഗതലത്തിൽ എത്തിക്കുന്നതും.

സാമൂഹികമായും സാമുദായിക-രാഷ്ട്രീയമായുമുള്ള അദ്ദേഹത്തിന്റെ നിലപാടുകളും എപ്പോഴും മനുഷ്യസ്നേഹത്താൽ നയിക്കപ്പെട്ടതാണ്. കേരള സർക്കാരുമായി സഹകരിച്ച് എത്രയേറെ ആയിരങ്ങൾക്കാണ് അദ്ദേഹം കിടപ്പാടം ഒരുക്കിക്കൊടുത്തിരിക്കുന്നത്. ഐക്യത്തെ പ്രോത്സാഹിപ്പിക്കുകയും ന്യായം ഉറപ്പാക്കുകയും ദുർബലരുടെ ശബ്ദമാകുകയും ചെയ്യുന്നതിലാണ് അദ്ദേഹത്തിൻ്റെ ആനന്ദമെന്നാണ് ഇതൊക്കെയും വിളിച്ചോതുന്നത്.

ഒമാനിൽ നിന്നാരംഭിച്ച അദ്ദേഹത്തിന്റെ സ്ഥാപനമായ ഗൾഫാർ, ഇന്ന് മിഡിൽ ഈസ്റ്റിലെ നിരവധി രാജ്യങ്ങളിും ഇന്ത്യയിലും ബ്രൂണൈയിലും മാൽഡൈവ്സിലുമായി വ്യാപിച്ചു കഴിഞ്ഞു. ഈ രാജ്യങ്ങളിലെല്ലാം തന്നെ നിരവധി പദ്ധതികളിലൂടെ അദ്ദേഹം തന്റെ സാന്നിധ്യം ഉറപ്പിച്ചിട്ടുണ്ട്. ഒരുലക്ഷത്തിലധികം പേർക്ക് തൊഴിൽ നൽകുന്ന സ്ഥാപന ശൃംഖല എന്ന നിലയിൽ ഗൾഫാർ ശ്രദ്ധിക്കപ്പെടുന്നത്, ഡോ. മുഹമ്മദാലിയുടെ വ്യവസായ നേതൃപാടവത്തിന്റെ വലിയ തെളിവാണ്. തൊഴിലവസരം നൽകി ആയിരക്കണക്കിന് കുടുംബങ്ങളുടെ ജീവിതം മാറ്റിയെടുക്കുക എന്നതാണ് അദ്ദേഹത്തിന്റെ ജീവിതവിജയത്തിന്റെ ഏറ്റവും വലിയ നേട്ടമായി എണ്ണപ്പെടുന്നത് തന്നെ.

വ്യവസായ രംഗത്തെ നേട്ടങ്ങളെക്കാൾ കൂടുതലായി സമൂഹത്തിനായി അദ്ദേഹം ചെയ്തുകൊണ്ടിരിക്കുന്ന പ്രവർത്തനങ്ങളാണ് അദ്ദേഹത്തെ വ്യത്യസ്തനാക്കുന്നത്. വിദ്യാഭ്യാസത്തിനും, ആരോഗ്യമേഖലയ്ക്കും, സാമൂഹിക ക്ഷേമത്തിനും അദ്ദേഹം നൽകുന്ന പിന്തുണകൾ അദ്ദേഹത്തിന്റെ വലിയ മനസ്സിന്റെ പ്രതിഫലനമാണ്. നിരാലംബരും, സഹായം തേടുന്നവരും, ജീവിതത്തിലെ പ്രതിസന്ധികളിൽ കുടുങ്ങിയവരും — എല്ലാവർക്കും അദ്ദേഹം കരുതലിന്റെ കൈ ത്താങ്ങാകാറുണ്ട്. "വ്യവസായം ലാഭത്തിനായി മാത്രം നടത്തുന്ന ഒന്നല്ല, അത് മനുഷ്യന്റെ സേവനത്തിനു കൂടിയായിരിക്കണം" എന്ന നിലപാട് അദ്ദേഹം വ്യക്തമായി പുലർത്തുന്നു.

വ്യക്തമായ മനുഷ്യസ്നേഹപരമായ നിലപാടുകൾ അദ്ദേഹം പിന്തുടരുന്നതിൻ്റെ നിരവധി സന്ദർഭങ്ങളെ പുസ്തകം ഓർമ്മിപ്പിക്കുന്നുണ്ട്.

വ്യക്തമായ അഭിപ്രായങ്ങളും, വിട്ടുവീഴ്ചയില്ലാത്ത സമർപ്പണബോധവും അദ്ദേഹത്തെ ഒരു മാതൃകാ പുരുഷനാക്കി മാറ്റിയിട്ടുണ്ട്. അദ്ദേഹത്തിന്റെ ദൗത്യബോധം, ഓരോ വിഷയത്തോടുമുള്ള ഗൗരവമായ സമീപനം, ഒരു സംരംഭകനെ മാത്രമല്ല, സാമൂഹിക ദാർശനികനെയും നമ്മൾക്ക് അദ്ദേഹത്തിൽ കാണാൻ ഇടയാക്കുന്നു.

ഡോ.മുഹമ്മദാലിയുടെ ജീവിതം നമ്മോട് പറയുന്ന ഏറ്റവും വലിയ സന്ദേശം, ഒരു കാര്യം "ദൗത്യം" ആയി കാണുമ്പോൾ അതിന് പ്രത്യേകമായ മൂല്യം കൈവരിക്കുമെന്നതാണ്. വ്യക്തിപരമായ നേട്ടങ്ങളിൽ ഒതുങ്ങാതെ, അത് സമൂഹത്തിനും മനുഷ്യകുലത്തിനും ഉപകാരപ്പെടുമ്പോഴാണ് ജീവിതം സമ്പൂർണമാകുന്നതെന്ന് അദ്ദേഹം തെളിയിച്ചിരിക്കുന്നു.

സാമ്പത്തിക നേട്ടങ്ങളിൽ മാത്രം അളക്കാവുന്ന ഒന്നല്ല ഡോ. മുഹമ്മദാലിയുടെ ജീവിതം. കരുണയും കരുതലും ഒരു പോലെ കൈകോർക്കുന്ന മനുഷ്യകേന്ദ്രിത വ്യവസായ മാതൃകയാണ് അദ്ദേഹം ലോകത്തിന് മുന്നിൽ അവതരിപ്പിച്ചിട്ടുള്ളത്. വ്യവസായ വളർച്ചയ്ക്കൊപ്പം, മനുഷ്യസ്നേഹം നഷ്ടപ്പെടാതെ മുന്നേറാൻ കഴിയുമെന്ന് അദ്ദേഹത്തിന്റെ ജീവിതം നമ്മെ പഠിപ്പിച്ചു കൊണ്ടേയിരിക്കുന്നു.

ഗൾഫാർ മുഹമ്മദാലി — അല്ലെങ്കിൽ ഡോ. പി. മുഹമ്മദാലി — ഒരു വ്യവസായിക്ക് അപ്പുറം, മനുഷ്യസേവനത്തിന്റെ വഴികാട്ടിയാണ്. സ്വന്തം പരിശ്രമത്തിലൂടെ വിജയത്തിന്റെ കൊടുമുടിയിൽ എത്തി, അവിടെ നിന്നുകൊണ്ട് സമൂഹത്തെയും മനുഷ്യരെയും കരുതലോടെ കാണുന്ന ഒരു മഹാനായ വ്യക്തി.

ജീവിതത്തിന്റെ എല്ലാ മേഖലകളിലും അദ്ദേഹം തെളിയിച്ച സമർപ്പണവും മനുഷ്യത്വവും പുതിയ തലമുറകൾക്ക് പ്രചോദനമായി തുടരുക തന്നെയാണ്.

സമർപ്പണബോധം, ക്ഷമ, കരുതൽ, സേവനം എന്നിവയുടെ മൂർത്തീഭാവമാണ് ഡോ. മുഹമ്മദാലി. അദ്ദേഹത്തിന്റെ ജീവിതം ബോധപൂർവം തിരഞ്ഞെടുത്ത ലക്ഷ്യങ്ങളിലേക്ക് നയിക്കപ്പെടുന്ന ഒന്നാണ്. വെറും ആകസ്മികതയല്ല എന്ന് തന്നെ അർത്ഥം. തന്റെ വിജയം, തനിക്ക് മാത്രമായി അനുഭവിക്കാനുള്ള ഒരു മാർഗമായിട്ടല്ല, മറിച്ച് തന്റെ ചുറ്റുമുള്ളവരുടെ ജീവിതം കൂടി മെച്ചപ്പെടുത്താനുള്ള ഒരു അവസരമായിട്ടാണ് അദ്ദേഹം കാണുന്നത്.

എല്ലാറ്റിനും പ്രചോദനമായി നിഴൽ പോലെ കൂടെയുള്ള അദ്ദേഹത്തിൻ്റെ പ്രിയതമയായ റസിയയെപ്പറ്റിയും , നാല് മക്കളെ പറ്റിയും ഗ്രന്ഥകാരൻ വിവരിക്കുന്നുണ്ട്. ഇന്ത്യയിലെ MFAR ഗ്രൂപ്പും അതിന് കീഴിലെ PM ഫൗണ്ടേഷനും ചെയ്യുന്ന മാനുഷിക പ്രവർത്തനങ്ങളെയും ഗൾഫാർ ഗ്രൂപ്പിൻ്റെ അതിവിപുലമായ ശൃംഖലകളെ വിശദീകരിച്ചും ഒരു നല്ല വായനാനുഭവം പ്രദാനം ചെയ്യുന്നുണ്ട് 140 പേജുകളിൽ ഒതുങ്ങുന്ന ഈ പുസ്തകം.

ഡോ. പി. മുഹമ്മദാലിയുടെ കഥ വിജയത്തിന് മാത്രമല്ല, മനുഷ്യത്വത്തിനും ഉത്തരവാദിത്തത്തോടെയുള്ള ജീവിതത്തിനുമുള്ള ഒരു പാഠമാണ്. അദ്ദേഹം തെളിയിച്ചത്, യഥാർത്ഥ സമ്പന്നത ഒരു ബാലൻസ് ഷീറ്റിൽ അല്ലെന്നും ചുറ്റുമുള്ള മനുഷ്യജീവിതത്തിൽ ഉണ്ടാക്കാനായ പോസിറ്റീവ് ആഘാതത്തിലുള്ളതുമാണ് എന്നാണ്. അദ്ദേഹത്തിന്റെ കാഴ്ചപ്പാടുകൾ എല്ലാ തലമുറകൾക്കും ഒരു പ്രചോദനമാണ്. സ്വപ്നം കാണുക, കഠിനമായി പ്രവർത്തിക്കുക, വിജയിക്കുക, എന്നാൽ ഒരിക്കലും നിങ്ങളുടെ വേരുകളോ മനുഷ്യസ്നേഹമൂല്യങ്ങളോ മറക്കരുത് എന്നതിന്റെ സന്ദേശം. അദ്ദേഹം നിർമ്മിച്ച കോർപ്പറേറ്റ് സാമ്രാജ്യം പ്രശംസനീയമാണെങ്കിലും, അദ്ദേഹം നിർമ്മിക്കുന്ന മനുഷ്യത്വത്തിന്റെ പൈതൃകമാണ് ഏറെ അമൂല്യവും ശാശ്വതവുമായത്.

-നജീബ് കടമ്പോട്ട്.

27aug25.

​